Одбележување на Светската недела на детето

На повод последниот ден од одбележувањето на Светската недела на детето, беше организиран прием за дечињата од градинките и првачињата кај градоначалникот Костадин Личков и претседателот на Советот Тина Петрова.
Првата недела во месецот е Детска недела, а првиот ден е Светски ден на детето и по тој повод детските градинки ,, Ѕвездички “ и „Кокиче“ како и првачињата од ОУ „Климент Охридски“ беа во посета кај градоначалникот.
При посетата на општината Чешиново-Облешево децата одблиску се запознаа со начинот на кој функционира локалната самоуправа.
Децата се интересираа за работните обврски на градоначалникот, колку трае работното време на вработените во општината и други интересни прашања.
Градоначалникот се обрати до децата посакувајќи им успешни училишни и безгрижни детски денови.

„Денес како градоначалник на општината но и како родител сакам да упатам една порака до вас. Вашето време поминувајте го во дружење, спортување и учење, бидејќи моќта е во знаењето. Сакајте ги своите родители, сакајте го своето семејство и почитувајте ги најблиските. Само така, вашите родители ќе бидат горди на вас, а покрај нив и ние како општина“.